DIARIO DE GRAVACIÓN

DIARIO DE GRAVACIÓN.
sexta feira, 28 de novembro de 2014.

Hoxe andamos a recoller e a preparar as cousas que temos que levar ós estudios Pousada Son. Mañán, sábado 29 de novembro, ás 10.30 da mañán comezamos a gravación do noso décimo traballo discográfico.

Estaremos producidos, ó igual que no recenté “Némesis”, por Iago Pico e imos gravar 14 cancións.

A nosa intención é facer un disco optimista e fresco e que veña a darlle unha volta de folla ó apocalíptico “Némesis”.

A idea de facer este traballo tan encima da saída do anterior disco ven motivada polas nosas ganas de darnos o mellor autoagasallo do mundo e tamén un feixe de osíxeno para seguir adiante na nosa maneira de entender a música. E tamén, probablemente, como a celebración persoal, íntima e “privada”, xa que nós non che somos moito de festas-celebracións, de meternos nun estudio 20 anos despois de comezar a ensaiar e a facer cancións con esta teima de ruxe-ruxe aínda que oficialmente ben sabemos que o debut de ruxe-ruxe sobre as táboas dos escenarios do país foi no 96.

Será un traballo intenso pois queremos gravar de maneira ininterrumpida ata ter todo feito, aquelado e ben reaquelado e así poder enviar canto antes todo a fábrica.

Ó mesmo tempo Jairo Iglesias, da man de Pixel Fims, irá recollendo material e rematando a documental sobre ruxe-ruxe na que ven traballando dende fai uns meses e se todo vai sobre o previsto moi pronto vos daremos datas de presentación do disco e tamén a data de estrea do documental nun cine de Compostela.

Daquela contamos con vós …

e nós sempre agradecidos !!!

Comezamos a traballar. A ver que tal sae o resultado.

Seguiremos informando de cómo vai o proceso. 

Sempre adiante !!

HERDEIROS DA DITADURA

No 2013 Dios Ke Te Crew celebraron o seu 10 aniversario e dende ruxe-ruxe andabamos coa idea de facerlles a nosa homenaxe particular. Pensamos que facer e non se nos ocurreo mellor maneira que versionear “Herdeiros da ditadura”  un dos clásicos da música galega contemporánea. Tamén é certo que fixemos algo de trampa pois xa a tocamos con eles en directo nalgunha ocasión. O caso é que así nos quedou e agardamos que vos guste moito e que sobre todo lles guste a eles 🙂

Por outros 10 dos Dios Ke Te Crew !!! saúde e terra camaradas !!!!

recomendacións

Aquí tendes dous grupos cos que compartimos escenario neste último verán. Dúas bandas novas que son exemplo do que se está a cocer na música galega nos últimos tempos.

BORDERLINE79 estoupan en universos evocadores e co pouso do rock pesado, de factura fermosa e feita a golpe de calidade e talendo firmando un primeiro traballo discográfico que nos atrapou totalmente deixándonos con ben ganas de ver cara onde camiñan nun futuro musical que vaia se promete. En directo demostran que o rock do país está de celebración e de noraboa coa forza e talento que traen os que veñen dende atrás dando leña e construíndo cancións caralludas. 

SUPEROITO son tres que andan no punk rock e que destilan enerxía, honestidade e cancións que che deixan pegañento coma cando se che cae sobre a pel un bo likor de herbas. Son rockeiros e trepidantes e falan da vida dende Ordes. O seu disco é un agasallo de festa punk-rokeira e no seu directo encantáronos.

Recomendados quedan aquí por uns servidores. Escoitádeos e disfrutádeos 🙂